Davao City – Human sa kapin tulo ka bulan sukad giigo og sunod-sunod nga linog ang lungsod sa Magsaysay, Davao Del Sur, hangtud karon wala pa gihapon makabalik sa ilang mga pinuy-anan ug nagpabilin pa gihapon diha sa mga evacuation centers ang ubay-ubay’ng katawhan nga naapektohan sa katalagman.
Segun ni Anthony Allada, Magsaysay Municipal Information Officer, wala pa nila gitugtan nga maka-uli sa tagsa-tagsa nila ka mga panimalay ang ilang katawhan tungod kay wala pa gibakwi ang deklarasyon nga ‘No Man’s Land’ ang pipila ka mga barangay nga gidamyos og maayo sa nakalabay’ng linog.
Matud ni Allada, gipaabot na lamang nila nga matukod sa National Housing Authority (NHA) ang mga temporary shelters una pa nila balhinon ang ilang katawhan gikan sa mga evacuation centers hangtud mapatuman ang hingpit nga rehabilitasyon sa ilang lungsod nga gigun-ob og maayo sa mga pagtay-og sa kayutaan.
Sa pagkakaron, ang NHA sa pakig-alayon sa lokal nga panggamhanan sa lungsod nangita og mga luna diin itukod ang mga balay alang sa mga pamilyang biktima sa mga pagtay-og niadtong October hangtud December sa nakalabay’ng tuig.
Tulo ka mga barangay sa lungsod ang pagatukoran og 2,000 ka mga balay sa NHA ang target humanon ug kumpletohon sulod sa unom ka bulan subay sa kamanduan ni Pres. Rodrigo Duterte aron makabalhin gilayon ang mga biktima sa mga linog.
Ang Department of Social Welfare & Development Office (DSWD-XI), walay hunong ug regular ang ilang pagtunol og mga hinabang matag semana aron maseguro nga dili mahutdan og pagkaon ang mga biktima nga nag-estar karon sa nagkadaiyang mga evacuation centers, sumala ni Allada.
Ang bugtong problema nga gisagubang karon sa katawhan mao ang kakulang sa supply sa tubig nga gamiton alang sa pagpangluto, panghugas, panglaba, pangka-ligo ug paga-imnon hatud sa pagkadaut sa mga reservoir tungod sa linog.
Samtang nagkadugay sa mga evacuation centers ang gatusan ka mga pamilya, aduna nay pipila partikular mga bata nagkasakit apan kini common ra nga balatian sama sa sip-on ug kalentura nga maoy gitutukan sa ilang mga medical workers, dugang ni Allada.
RadyoMan Joel Viray
