TACLOBAN CITY – Nagmulay hin basketball an mga sikat nga movie ngan television actors kontra ha mga politicians sugad kan Senator Juan Edgardo ‘Sonny’ Angara ngan Florencio ‘Bem’ Noel han An Waray party-list group dida han nakalabay nga dominggo, Marso 3, 2019.
Nahinabo ini ha Tacloban Convention Center, kumo kaparte ha pag-abri han second season han Eastern Visayas Basketball League (EVBL).
An mga artista amu hira Adrian ‘Luis’ Alandy, Marco Alcaraz, Mark Herras, Joross Gamboa, Onyok Velasco, Matt Evans, Jordan Herrera, Tirso Cruz III, Dennis Padilla, ngan Christopher De Leon.
An ira kontra nga politicians amu hira Sen. Angara, former Rep. Noel han An Waray Party-List Group, Biliran Governor Gerardo ‘Gerry Boy” Espina, Jr., ngan Former Congressmen Neil Montejo.
Ha sakob han duha ka oras, an magkontra nga team in nagparisyo ha mga manuruod.
Matapos an mulay, nagdaog an team ni Bem Noel ha score nga 67-66.
Sumala kan Rey Evangelista, EVBL President ngan former PBA player, malipayon hira nga an first season han EVBL in nagmanilampuson.
Tikang ha orihinal nga five competing teams, yana mayada na 8 teams nga magmumulay ha EVBL.
An panuyo han EVBL nga magkamayada makusog nga mulay sugad hin basketball ha rehiyon nga makakontribwer ha industriya han turismo kun diin nahinanabo an liga.
Nalilipay naman hi Sen. Angara tungod nga nahimo an EVBL.
