TACLOBAN CITY – Purluminos 500 nga mga atleta ha Eastern Visayas an nagpapaisan-isan yana ha Palarong Pambansa 2018 nga gindudumara ha Vigan City, Ilocos Sur nga nagtikang dida han Abril 14, 2018.
Sumala kan Jazmin Calzita, DEPED Region 8 public information officer nga nagpapadayon pa ha pagka-yana an elimination round han kompetisyon.
Nangunguna la gihapon an NCR ha kadamo han gold nga nakuha na pero ginlalauman han DEPED Region 8 nga makakalanat pa an aton mga atleta mahitungod nga damo an taga EVRAA nga nagdadaog ha elimination rounds.
Dugang pa han opisyal nga mas makusog la gihapon an Eastern Visayas ha mga combat games kun diin ginlalauman nga didto makakakuha hin damo nga gold medal an mga atleta.
Ginbabana-bana P850,000 an nalikom nga pondo han DEPED Region 8 tikang ha magka-durudilain nga LGU’s ngan DEPED division ha Sinirangan Bisayas nga magagamit para ha mga panginahanglan.
Patapod naman han DEPED nga diri napapabay-an an tanan nga mga atleta han rehiyon.
An makakakuha hin gold medal nga atleta in makakakarawat hin incentives tikang ha DEPED, P15,000.00 para ha gold, P10,000.00 ha silver, ngan P5,000.00 ha makakakuha hin bronze. Matatapos an Palarong Pambansa yana nga Abril 21, 2018.
