Ex-CAA giangkong intensyon nga patyon ang biktima kay ‘salot’ na kini sa katilingban

Davao City-Walay pagmahay ug giingong intensyon sa suspek nga usa ka EX-CAFGU ACTIVE AUXILIARY (CAA) nga mamatay ang gipusil niini nga biktima kay alang kaniya salot na sa katilingban kay alegasyong nalambigit kini sa mga pagpanglungkab ug pagpangawat sa ilahang lugar.

Priso na karon ang suspek nga si Resty Malaras Montargo, 32-anyos nga taga Belisario Subdivision ning syudad.

Nadakpan kini atol sa hot pursuit operation sa mga sakop sa Bajada Police Station sa pagpanguna ni Station Commander Police Major Antonio Luy.

Samtang kritikal karon sa Southern Philippines Medical Center ang biktimang si Robert Gallera, 40-anyos, construction helper nga taga-Purok 2 Carmelite Road Bajada.

Sa imbestigasyon, alas 5:40 sa hapon adlawng Huwebes sa Carmelite Road Bajada samtang namunit og gulay ang biktima giduol kini sa suspek ug gipusil sa makadaghang higayon.

Napulo ka mga samad pinusilan ang nahiaguman sa biktima lakip na tulo ka mga gunshot wounds sa ulo.

Matud ni Luy dakong tabang ang CCTV footage sa paspas nga pagsolbad sa shooting incident tugod aktwal gayod nga na-record ang pagpamusil ug pag-identify sa suspek.

Kasong frustrated murder ug illegal possesion of firearms ang ipasaka batok sa suspetsado.

RadyoMaN Aimee Guinita