Davao City – Patay ang usa ka lalaki nga kanhing napreso tungod sa kaso sa iligal nga droga kun R.A. 9165 ug sa illegal possesion of firearms and amunation human giingong nisukol sa gilusad nga drug buy-bust operation alas-2:00 kagahapong adlawa sa Brgy. 76-A ning syudad sa Davao.
Ang biktima giila nga si Rico Ainin Dordolia, 40 anyos, taga-Brgy. 21-C Piapi Boulevard, kinsa gikunsidera nga Top 9 high value target (HVT) drug suspek sa DCPO ug PDEA XI.
Base sa report, malampusong napalitan og iligal nga droga ang biktima apan sa dihang nakabantay kini nga police ang gikatransak niini kalit kining mibunlot sa iyang 9mm nga pistola ug matud pa gipabuthan ang mga kapolisan.
Gumikan niini mibalos sa pagpusil ang awtoridad tumong sa nagkadaiyang parte sa kalawasan ni Dordolia.
Gisulayan pa kini og dala sa Southern Philippines Medical Center (SPMC) apan gideklara na kining dead on arrival.
Sa pagpanubay sa Scene of the Crime Operatives (SOCO), narekober sa crime sceen ang usa ka homemade 9mm Taurus, revolver cylinder nga dunay sulod nga tulo ka live ammunitions, duha ka fired cartridge ug lain pang lima ka basiyo sa bala gikan sa armas nga gigamit.
Narekober usab ang usa ka libo nga markadong salapi, drug paraphernalia ug mga pakete sa gituohang shabu nga nag kantidad sa kapin kun kulang P5,000.
Kasamtangang anaa na sa kustodya sa PDEA XI ang droga ug anaa sa Talomo PNP ang mga non-drug items.
RadyoMaN Paul Canono
