Davao City – Daling girespondehan sa Panabo City Police Station ug sakop sa SWAT Team, ang reklamo nga ilang nadawat alas-7:00 sa buntag adlawng Huwebes batok sa kanhi pulis nga armadong mipugos pagsulod sa panimalay sa kanhi kapuyo niini sa Purok 3, Brgy. Salvacion, Panabo City, Davao del Norte.
Sa interbyu sa DXDC RMN Davao kang Police Lt. Col. Ernesto Gregore, Chief of Police sa Panabo City Police Station, nag-unay og pusil sa iyang ulo ang kanhi pulis human nasayran nga dili na makigbalik ang ex-live-in partner kaniya.
Ang biktima giila nga si Michael Ibabao Barol, 31 anyos ug residente sa Yakal St., Brgy. New Pandan, Panabo City ug nag-AWOL (absent without leave) sukad niadtong tuig 2017.
“Naghikog ang victim kay gusto niya balikan tong iyahang ka live-in dati pero di naman musugot. Karon kay pagresponde sa mga pulis ug pag abot sa tropa didto naa namay usa ka buto. Naabutan mi’g halos usa ka oras nga negotiation wala man gyod mu-response mao tong gisulod nalang namo ang balay tua naman diay naghigda (wala nay kinabuhi) sa may hagdanan dapit,” sumala ni Gregore.
Sumala sa inbestigasyon, nakahiagom og samad pinusilan sa walang bahin sa ulo ug nilapos sa pikas hinungdan sa iyang kamatayon.
Narekober sa crime scene ang usa ka unit sa CANIK 9mm pistol nga adunay Serial No. T6472-18-BG 08855 ug PNP logo ingon man ang fired cartridge case nga gituohang gikan sa caliber 9mm pistol.
Gidala sa Sta. Theresa Funeral Homes ang patay’ng lawas ni Barol aron ipailawom sa awtopsiya .
RadyoMaN Aimee Guinita
