TACLOBAN CITY – Naul-ulan an babaye matapos nga kastiguhon hiya han iya katrabaho nga lalaki ha ira opisina ha Marasbaras, syudad han Tacloban dida han Martes.
Nakuhaan pa han CCTV Camera an mao nga insidente nga nagtrending naman ha Facebook matapos nga ig-post han biktima ngan lampas 100, 000 an nakakita han video.
Dayon nga ginpanginano han RMN kun ano an ngaran han lalaki nga nangastigo. Ginkilala ini nga hi Reynon Louise Tan.
Ha Eksklusibo nga interview han RMN ha biktima nga igintago namon ha ngaran nga Jaica Mae, sumala ha iya, nag-isog hiya kay ginbabastos daw ni reynon tan an iya katrabaho liwat nga babaye.
“An akon kasi upod, syempre as a workmate nasina ako kay iya ba ginbibinastos an akon ka-workmate nga maaram hiya nga nasisina gihap ha iya kay iya ginkikinulit. Diri ako maaram kun ano an iya intensyon so sumiring ako ha iya nga kuya pagrespeto gad baga ka amn hin waray buot, so ansya adto nasina hiya ha akon.”
Ginkadto han RMN News team an opisina nga gintatrabahuan ni Jaica Mae sanglit nabaruan han RMN nga under termination na hi Reynon Tan ha iya gintatrabahuan.
Naka-istorya liwat han RMN an babaye nga gin-ugupan ni Jaica Mae basi han iya salaysay.
Sumala han babaye nga waray na magpakilala ha amon an ngaran, ginkakaptan daw hiya ni Reynon Tan ha mga pribado nga parte han iya lawas.
Sumala naman kan PCInsp. Rex Cantillep, Deputy City Director han Tacloban PNP, pwede nga pasakahan hin kaso nga physical injury ngan act of lasciviousness hi Reynon Tan.
“Pwede nga pasakahan hin kaso an suspek nga physical injury depende han resulta tikang ha doctor kun slight injury or serious physical injury. Kun ginkakaptan man hira ha pribado nga parte han iya lawas pwede liwat naton pasakahan an suspek hin kaso nga act of lasciviousness.”
