Davao City – Naangayan sa Sentro ng Nagkakaisa at Progresibong Manggagawa ang plano nga mas palapdan pa ang total deployment ban sa mga nasud nga dunay taas nga kaso sa abuso sa mga Overseas Filipino Worker (OFW) ug Domestic Helper (DH).
Sakto nga mas dugangan pa ang mga nasod nga pahamtangan og total deployment ban nga adunay taas nga record sa pangabuso ug pagpatay sa mga OFWs ug mga DH.
Apan segun ni Sentro Labor for Global Secretary General Joshua Mata nga ipaneguro lang usab sa gobyerno nga dunay masudlan nga trabaho ang mga OFW ug mga DH nga maapektohan sa ban.
Naila-ila sa STP Investigative Team si Adelfa Giersa kinsa kanhi OFW sa Tungang Sidlakan ug karon malampuson na nga negosyante dinhi sa dakbayan.
Giingon niya nga dili tanang nasud sa Tungang Sidlakan delikado trabahoan sa mga Pilipino kay naa man usay nasyon sa mao nga kontinente nga open city ug may pagka-liberated.
Kung narisgo man ang kinabuhi sa atong mga kababayan sa pipila ka lugar sa Middle East kana tungod kay walay napirmahang bilateral agreement ang gobyerno sa Pilipinas ug ang partikular nga nasud sama sa Kuwait.
Gipasabot ni Mata nga prone sa abuso ang mga Pilipino sa mga nasud nga walay kasabutan sa gobyerno sa Pilipinas alang sa proteksyon ug luwas nga pagpanarbaho sa mga Ofws ug sa mga Domestic Helpers.
Samtang gipaboran sa secretary general ang pagpalapad sa total deployment ban gidasig sab niini ang administrasyong Duterte nga tutokan ang ekonomiya sa Pilipinas.
Kay mao kini ang mupaengganyo sa mga Pilipino aron dili na manarbaho sa ubang nasod kay dinhi sa atong dapit aduna naman unya’y masudlan nga trabaho uban sa sakto nga sweldo ug benepisyo matag bulan.
Apan kun dili kini mabuhat sa gobyerno mas makadaghan pa sa mga Pilipino maninguha sa pagsugal sa mga delikado nga nasud aron manarbaho nga sa pamasin mahaw-as pa sila gikan sa kalisod.
RadyoMaN Joel Viray
