Davao City – Gitino karon ni Presidential Communications Office (PCO) chief Martin Andanar nga ning mga gutlo-a, wala pay national martial law sa nasud ug nga halayo kini nga scenario.
Sa radio social commentary program nga ‘Straight to the Point,’ gibatbat ni Andanar nga kabalaka kini nga mugna lamang niadtong mga taga-oposisyon ug niadtong wala maka-uyon sa mga palisiya ug prayoridad sa presenteng rehimen.
Hinonoa, nagpasidaan ang hepe sa communications office sa palasyo sa Malacañang nga ang status quo mo-estar lamang kun ang mga kritiko sa gobyerno molusad sa ilang gibahad nga lihuk-protesta sa malinawon nga porma kun pamaagi.
Sa higayun nga mogamit na unya ug kaguliyang kun anarkiya ang mga magprotesta, nan posibleng mapugos gayud ang pamunuan ni Pres. Rodrigo Duterte nga mogamit ug ‘pwersa’ diha sa pagpatunhay sa kalinaw.
Una niini, gikabalak-an sa militant sector ang ilang giingon nga ‘creeping dictatorship’ sa Duterte administration diha sa mga nagapanghitabo sa nagkadaiyang sangay sa pamunuan nga supak sa rehimen.
Sa parte sa mga tigpaminaw sa STP, sila naha-uyon sa scenariong expanded, total or nationwide martial law sa katarungan nga kini na unya ang mag-establisar sa kalinaw ug estabilidad pinaagi sa pagpugong sa mga panghitabong destabilisasyon niadtong opposed sa Malacañang ning mga tungora.
RadyoMan June Duterte
