Davao City – Gipaluyuhan karon sa ubay-ubay’ng mga lungsuranon ning dakbayan ang sugyot ni House Speaker Pantaleon ‘Bebot’ Alvarez nga palugwayan pa ang balaud-militar hangtud tuig 2022.
Sa atong morning primetime radio social commentary program nga ‘RMN Straight to the Point’ uban ni Kasamang June Duterte, gibarugan ni Prof. Ramon Casiple, Executive Director sa Institute for Political & Electoral Reforms (IPER) nga wala siyay seryosong paghisupak sa martial law silbing counter-terrorism measure.
Apan giklaro sa iladong political analyst nga taas ra kaayo ang lugway kun extension sa balaud-militar ngadto na sa tuig 2022 kun dungan sa pagtapos sa pangatungdanan ni pamuno-nasud Rodrigo Duterte.
Matud ni Casiple, ang nasangpit nga extreme measure maingon nato nga ‘situation-dependent’ kun ‘crisis-contingent’ buot ipasabot nga gikinahanglan kun relevant lamang kini nga hugot nga klase sa liderato kun gipanawagan usab sa malisud nga sirkumstansiya sama sa rebelyon sa Maute Group sa Marawi City inubanan sa invasion sa mga foreign jihadists, extremists, religious fanatics ug fundamentalists kinsa nigamit lamang sa relihiyong Islam aron pagtakuban sa ilang nilu-og nga adyenda ug hiwi nga ideolohiyang panerorismo.
Usab nituyhakaw karon ang komon nga opinyon sa mga yanong residente nga nidason sa martial law hangtud ngadto sa 2022 bugti sa kaseguruhan nga magmalig-on ang seguridad ingon man estabilidad sa katawhang Dabawnon ug Mindanaoan.
Una niini, ninggula ang usaka survey sa Social Weather Stations (SWS) gipasiugdahan niadtong June 23-26, 2017 diin mokabat sa 57% sa mga respondiyente dakung pabor sa Mindanao Martial Law implementation. Sa susamang opinion polling hinoon, nilutaw nga unom sa matag 10 ka mga survey subjects wala mahiuyon sa sugyot nga palapdan pa ang balaud-militar ngadto sa Visayas ug Luzon.
Kasamang June Duterte
tags: Mindanao, Davao City, DXDC, DXDC 621, June Duterte, Straight to the Point, Professor Ramon Casiple, Martial Law
