Davao City – Walay nakita nga problema ang kanhi opisyal sa Inter-Agency Council for Traffic (I-ACT) sa mando karon sa Land Transportation Franchising and Regulatory Board (LTFRB-XI) nga pasuoton og face shield or eye protector ang mga musakay sa mga pampublikong sakyanan.
Matud ni former I-ACT Deputy Executive Director Elmer Argano, balido ang direktiba sa LTFRB nga magsuot og face shield kon eye protector ang buot musakay sa mga pampublikong panakayan sa ngalan sa kaluwasan sa tanang mga pasahero gikan sa COVID-19.
Sumala ni Argano, ang pagpasuot og face shield kon eye protector gawas sa face mask dili kalapasan sa Bayanihan to Heal as One Act gani pangdepensa hinoon kini sa mga pasahero gikan sa virus maong ang gobyerno nangita og pamaagi nga maluwas gikan sa makamatay nga sakit ang katawhan.
Ang pagsuot og face shield kon eye protector timailhan kini sa responsableng kinaiya tungod sa paghuna huna sa maayong panglawas ug kaluwasan sa tanang mga sumasakay.
Dugang sa kanhi opisyal sa I-ACT nga wala usab siya’y nakita nga problema kung ugaling himoong parte sa palisiya og mga health protocols ang face shield kon eye protector gawas sa face mask inay makatabang hinoon sa tanan.
RadyoMaN Joel Viray
