Davao City – Gi-akusahan sa usa ka konsehal ning siyudad sa Dabaw ang Facebook nga biased kini human gitanggal ang gatusan ka mga accounts nga misuporta sa administrasyong Duterte.
Matud ni First District Councilor Joanne Bonguyan-Quilos, dili makatarunganon ang gibuhat sa FB nga basta na lang papason ang mga accounts sa mga misuporta sa kagamhanang Duterte.
Gisaway ni Quilos ang lakang sa FB batok sa mga account users nga wala man la’y gilusad nga imbestigasyon kalabot sa mga post nga unod ang binayloay og hait nga pinulongan ug akusasyon tali sa mga supporters kang Duterte ug sa opposition.
Mas nasagmuyo pa gyod ang konsehal sa FB gumikan sa wala paglakip sa mga online troll accounts nga giingong binuhi-an sa opposition kansang tahas mao ang pag-atake kang Duterte ug sa pagdaut sa first family.
Sa tan-aw ni Bonguyan, ang gibuhat sa FB dayag nga pagpanghilabot sa pulitika sa nasud diin may dakung epekto kini sa ilang market dili lang sa Pilipinas apan bisan pa sa tibuok kalibutan.
Sa pagpanubay sa RMN Davao, nasayran nga ang founder sa FB nga si Mark Zuckerberg mikumitir og suporta sa gobyerno sa Amerika diin kabahin sa iyang saad mao ang paghatag og linya sa datos sa milyon ka FB users sa tibuok kalibutan.
Nasayran usab nga ang Facebook gigamit sa Federal Bureau Investigation kun FBI aron maniktik sa mga mga gobyerno sa laing mga kanasuran ug sa mga indibidwal nga mikontra ug naghatag og hulga sa Estados Unidos.
Makapila na gibulgar ni Duterte nga ang FBI nakig-abin sa opposition ug sa mga kritiko ug sa ubang grupo aron pahagsaon ang iyang panggobyerno gumikan usa sa bug-at nga rason mao pagbanat ug pakighigala ni Duterte ngadto sa China.
Usab nasayran nga usa sa labaw sa Facebook Philippines kanhi konektado sa opposition political party ug samtang ang Rappler nga numero unong kritiko sa gobyerno gitudlong opisyal nga fact checker sa mga panghitabo sa nasud.
Samtang ang Rappler Chief Executive Officer nga si Maria Ressa makaduha nang higayon gidakop gumikan sa duha ka mga kaso sama sa violation sa Anti-Dummy Law diin masabtan gilayon nga na single-out ang mga pro-government accounts diha sa purging sa Facebook.
Gihagit ni Bonguyan ang Facebook nga maglusad og independiyente ug kinaugalingong imbestigasyon aron dili magduda ang mga pro-government supporters nga gigamit lamang sila sa opposition ug aron sa ingon, dili mobiya ang kadaghanan sa mga Pilipino diha sa paggamit ug pag-patronize sa nasangpit nga social media site.
RadyoMaN Joel Viray
