Un fadrasto ya sacudi y ya morde pa con el orejas del su 3 año de edad entenada na barrio de Lanzones del Lunes por la tarde.
El jefe del Culianan Police Station si Chief Insp. Hazel Fernandez ya nombra con el suspechao como si Ronald Delos Reyes, 36, del mencionao lugar.
Asegun con el reclamao del nana del bata que es unido con Delos Reyes si Rossel Alavarta y Gomez, 32, un cusenera, ya llega le na diila casa ta escuricia ya cuando ya descubri le tiene rastro del mordedura el lao derecha orejas del su hija como resulta el cosa ya hace el fadrasto del bata.
Mas de ese, si Delos Reyes ya sacudi pa con el bata usando palo na su esquierda mano.
El soseso ya ocuri banda alas 5 del tarde.
De recivir el pulis conel reclamo di Alavarta, esiguidas estos ya apunta na Lanzones aber para aresta con el suspechao pero ta esta ya este perdido.
Con el bata ya lleva na hospital para el curada.
El asunto ta esta pa bajo na investigacion na estacion del Culianan.
