Indi matuod kag ginakabig nga ‘fake news’ ang nagalapta nga impormasyon sa social media nga may mga miembro sang Islamic State of Iraq and Syria ukon ISIS sa Iloilo.
Ini ang ginkumpirmar ni Police Supt. Joem malong, tagpamaba sang Police Regional Office (PRO) 6.
Suno kay Malong, sa ila pagverify, napamatud-an nga wala sang kamatuoran ang nasambit nga impormasyon.
Pahayag ni Malong, padayon ang monitoring sang Police Regional Office 6 agud malikawan ang posibilidad sang kalakasan ukon terorismo sa rehiyon.
Gin-athag man ni PSupt Joem Malong nga indi siya ang nagapalapta sang ‘fake news.’
Nagapangabay naman ang PRO 6 sa publiko nga sa baylo nga ipalapnag ang “fake news,” mas maayo nga ireport na lang sa pinakamalapit nga police station ang mga makaduluda nga personalidad nga ila makit-an.
Suno sa PRO 6, kon makabaton sang impormasyon mas maayo kon magkadto na lang sa police station kag ireport ang mensahe kag indi na pag-ipost ukon share sa social media agud indi makatuga sang kahadlok sa iban.
Photo from web
