Davao City – Gihatagan og gibug-aton sa Parents Mobilization Action Group (PMAG) ang kamahinungdan sa komunikasyon sa pamilya isip pang-alkontra sa sakit nga depresyon.
Segun ni PMAG Davao City Chapter President Febe Matthew, ang pamilya nga walay komunikasyon duolunon kaayo sa depresyon kay wala may masangpitan ang banay nga dunay suliran.
Matud ni Matthew, babag sa komunikasyon sa pamilya ang gadget ug social media diin tungod ani daghan sa mga tawo na-depress nunot sa mga problema apan wala maalalayi sa kabanay mismo.
Wala na usab matingala si Matthew sa pagka-initon og ulo sa mga tawo karon diin ang kakuwang sa pasensiya bunga sa stressed nunot sa sobra nga pagtan-aw sa television.
Ang taas nga tan-aw sa TV magpa-impluwensiya sa kinaiya bisan ang gitan-aw pwede magpa-usab sa batasan sa tawo sama sa dali pagkaputong ug uban pa.
Ug sagad sa nagpakita sa ingon ani nga pamatasan hayan musangko sa pagkutlo sa kinabuhi, dugang sa PMAG President.
Tambag ni Matthew ngadto sa mga tawong dunay problema mao nga gikinahanglan ipaambit sa pamilya ug sa suod nga higala aron matabangan makalingkawas gikan sa mga suliran samtang dili pa mahog nga depresyon ang emosyonal nga pagbati ug malikayan ang pagpakamatay.
RadyoMaN Joel Viray
