Malampuson nga Bangsamoro Organic Law.
Kini maoy gi-ampo ni Father Teresito “Chito” Soganub atol sa Traslacion sa Itom nga Nazareno kagahapon.
Kini tungod kay matud pa ni Soganub, kitang tanan sa polo sa Mindanao ang apektado kung unsa man ugaling ang mahitabo sa maong balaod.
Si Soganub usa sa mga survivor o nakalingkawas sa pagpang-hostage sa teroristang Maute-ISIS dihang mi-ulbo ang giyera niadtong Mayo 2017.
Gi-ampo usab sa maong pari nga mahatagan og giya ug lamdag ang mga botante atol sa wala pa ang plebisito kung unsa gayud ang BOL aron maka-boto sila base sa ilang nasabtan.
Namahayag si Soganub nga iyang gipili nga sa Iligan mosalmot sa Traslacion tungod kay nahimo na’ng kabahin ang Iligan City sa iyang pagka-pari sulod sa kapin 20 ka tuig.
Sa Enero 21 ipahigayon ang plebisito sa Autonomous Region in Muslim Mindanao samtang sa Pebrero sa mga dapit nga gawas sa ARMM sama sa Lanao del Norte ug Cotabato City ug Iligan City kung tugutan kini sa COMELEC nga moapil sa plebisito.
