Fear Not

10

Davao City – Sa matag higayon sa atong paghigmata sa kabuntagon, makonsidera na kini nga gasa,panalangin ug ikaduhang tsansa: Tsansa nga tarungon ang tanan natong nabuhat nga kasal-anan ug kasaypanan, tsansa nga subling masaksihan ug masud-ong ang kaanindot ug kaanyag sa kalibutan ug laing tsansa usab aron kita mamahimong mas maligdong nga tawo niining hinulaman lamang nato nga kinabuhi ibabaw ning kalibutan.

Apan unsay imong buhaton kung usa ka adlaw niana, imong nasayran ug naamguhan nga anaa ka na diay sa tumang kalisud ug diyutay na lamang ang imong tsansa nga mabuhi?

“Pagsiga nako sa akong mata, ang Sacred Heart of Jesus akong nakita pero nipiyong kog balik… Hinay-hinay lang ko og mata..Nangatulog naman ang nurse oy ug nakita nako ang kasing-kasing ni Jesus Christ ba. Mao nang naa sa akong hunahuna nga kung posible nga ipahiram na nimo imong kasing-kasing sa akoa Lord bi? Kana lang gud di nako atakihon kay giingnan na biya ko nga operahan ko unya pa andamon nami og P500,000…”

Naila sa DXDC Team si Elena Madera, 68-anyos, usa ka leader ug active nga Katoliko sa Sto. Rosario Parish Toril, ug lumulupyo sa Toril ning syudad sa Davao kinsa nagsaysay sa iyang personal nga kasinatian sa kamaayo sa Ginoo.

Kun lantawon sa tawhanon nga pamaagi, daw imposible na nga maluwas pa siya sa iyang kahimtang naidtong panahona: ‘Milagro’ alang sa pamilyang Madera ang nahitabo kaniya gumikan sa arang ka komplikadong kahimtang niini.

Kasama, ang matag usa kanato aduna gayuy gikawilihan, gikabalak-an, gikahadlokan. Apan inay nga magpabilanggo kita sa atong gihambin nga tawhanong kahadlok, hagit alang natong mga magtotoo kun mga ‘believers’ nga gamiton kini silbing inspirasyon haron kita dili mahimulag, hinoon mas makapaduol pa diha sa sabakan sa Ginoo ingon man aron mamuhat kita og maayo alang sa atong isig kaingon.

Kun aduna kitay Ginoo nga masangpit ug masandigan sa tanang panahon, wala kitay angay nga kabalak-an bisan gamay, ni kahadlokan sa matag adlaw nato nga pagkinabuhi.

Nahisulat diha sa Isaiah 41:10 “So do not fear, for I am with you; do not be dismayed, for I am your God. I will strengthen you and help you; I will uphold you with my righteous right hand.”

RadyoMaN Jason Amisola

Facebook Comments