Davao City – Nasubo si Ateneo De Davao University Coach Professor Airnel Abarra nga nahulog sa rambol ang dula sa Gilas Pilipinas batok Australia Boomers sa Fiba World Cup Asian Qualifiers nga gipahigayon sa Philippine Arena sa Bulacan.
Nasabtan matud pa ni Abarra ang pagbati sa players sa Gilas Pilipinas human giyatakan og maayo sa mga magdudula sa Australia ang dungog isip mga Pilipino.
Dili maayo ang gihimo sa mga players sa Australia tungod gikaminosan nila og maayo dili lang ang mga magdudula sa Gilas apan lakip na ang tanang Pilipino pinaagi sa pagtawag nga ‘monkey’ ug uban pa.
Apan bisan paman niini, wala gihapon maka-uyon si Abarra sa gipakitang asta sa mga magdu-dula sa Gilas sanglit host ang Pilipinas sa Fiba Asia Cup Qualiers ug bisita ang mga Australiano.
Ang saktong gibuhat sa mga magdudula sa Gilas mao ang pagmulo una sa ilang head coach alang sa pormal nga reklamo batok Australia ug wala unta gipaagi sa init sa ulo.
Sa gibuhat sa mga magdudula sa Gilas nabutang sa ka-uwawan ang nasud sa tibuok kalibutan sanglit sa Pilipinas nahitabo ang rambola sa Fiba Asia Cup Qualifiers.
Nagtoo ang propesor nga anaa gihapon sa kasingkasing sa mga magdudula ang maayong pamatasan sa mga pinoy apan dako ang posibilidad nga nalimtan lang kini sanglit walay nagpahinumdom kanila niini.
Nanghinaot na lamang ang propesor nga magsilbing pagtulun-an sa mga Pinoy ang rambola sa Gilas ug Australia Team aron dili na ma-usab ang maong insidente.
RadyoMaN Joel Viray
