Davao City – Kun ako ang pasulti-on, gikinahanglan na gayud nato karon ang mas halapad o mas komprehensibong matang sa kampanya aron pildihon ug pukanon ang hulga nga dala sa makamatay nga klase sa balatian nga HIV-AIDS.
Ako uyon sa ideya nga mandatory or compulsory HIV-AIDS tests sa tanan, walay pili haron atong mapadala ang mensahe nga ato gayung seryosohon kining medical dilemma nato ug nga dili lang kita kutob sa istorya.
Himoong mandatory and maong eksaminasyon pareho sa gina-require kanato nga Medical Certificate sa atong mga importanteng transaksyon haron masayud ‘ta kun ang usa ba ka nilalang ‘fit’ ba siya sa mga buluhaton or kaakuhan nga manginahanglan ug maayong panglawas.
Dautan ba diay kana nga klase sa rekwisito nga ang tumong niana mao man lamang ang pagsalbar sa hingtungdan kay basin ug pinaagi niana, matabangan kun ma-asistir siya sa iyang mga panginahanglan-medikal?
Apan ako nagtoo nga samtang angayan lamang ang mandatory test, ang resulta angay itratar nato with utmost respect and confidentiality.
Kun ang usaka tawo mapalgang positibo niini, hagit sa estado nga siya tabangan kutob sa mahimo pinaagi sa pagtunol kaniya sa medical assistance antes pa man molala ang iyang kahimtang.
Ang resulta sa HIV-AIDS test dili angay himoong for publicity kay dili kana maoy orihinal nga intensyon sa naasoyng sugyot kun ideya.
Daku usab ang papel kun partisipasyon natong katawhan pinaagi sa paghatag unya sa atong konsiderasyon ngadto sa mga positive subjects aron sila makatindog nga magmalig-on bisan pa man sa maong kabilinggan nga wala silay bationg kaulaw o kukahadlok.
Ato silang tabangan nga ma-overcome o malabanan ang social stigma niadtong ubang mga tawong sobra ra usab ka judgmental kun ka mahukmanon diin inay pagbi-ay bi-ay, ang atong mamahimong ikatunol mao ang atong pagsabot ug mga kamot nga andam mo-agakay aron sila dili mawad-an sa paglaum nga magpadayon kun mag-move on sa ilang mga kinabuhi.
RadyoMaN June Duterte
