ILOILO City – Matapos ang construction sang One Spatial Building sang Filinvest Land ZInc. sa Brangay Tabucan Mandurriao, wala na makadumdom ang kumpaniya sa ila ginpangako sa mga tag-iya sang propedad nga nahimuan nila sang damages.
Pila sa mga natuga nga kahalitan sang Filinvest amo ang pagguba sang mga kaiping nga mga propedad ilabi na gid ang building ni Mr. Bernard dela Cruz, Zyron’s Bar and Restaurant ni Mr. Ryan Rosales kag ang panimalay mismo sang mga Rosales.
Una diri, sadtong May 29, 2017, ginsapol ang Filinvest, property owners kag iban pa nga involve sa Barangay Tabucan agud i-settle ang mga natuga nga damage sang construction.
Nagpahayag man ang Filinvest nga ila kay-uhon ang kon anuman nga kahalitan nga natuga sang ila construction kag sal-on nila ang mga gasto.
Bangod sa construction nga nagguba sa propedad sang mga Rosales, naglab-ot na s apunto nga gindapu-an na sang masakit ang mga miembro sang pamilya sini bangod man sa mga nagatap-ok nga materiales sang construction nga nagasulod sa ila puluy-an.
Subong nga bulan, wala sa gihapon natuman sang Filinvest ang ila nahisugtan sa ila pagsinapol sa Barangay Tabucan, Mandurriao.
Angot diri, nagsulat si Atty. Joshua Alim, legal counsel sang pamilya Rosales sa opisina sang City Engineer’s Office agud i-hold ang occupancy permit snag Filinvest nga wala nagtuman sa nahisugtan. /// Photo from web
