Sapian, Capiz- Napuhag ang mga residente malapit sa Poblacion, Sapian pasado alas 7 kaina sang aga makaligad nga nasunog ang baligyaan sang spare parts sang motor nga nahamtang sa amo nga lugar.
Padayon sa subong ang imbestigasyon sang mga katapo sang Bureau of Fire Protection sa Sapian kun ano ang matuod nga ginhalinan sang gulpi nga pag-ibwal sang kalayo.
Nahibaluan nga maluwas sa mga spare parts, nagabaligya man ang tag-iya nga si Ruben Oroceo sang tingi-tingi nga gasolina.
Madasig naman nga gindangat sa Roxas Memorial Provincial Hospital ang asawa sini nga si Emily Rebaño Oroceo matapos nga ini ang na-trap sa sulod. Nag-angkon ang biktima sang mga paso sa kamot kag iban pa nga bahin sang lawas.
Ginkatingala naman sang mga residente ang wala gilayon pagresponder sang mga katapo sang BFP sa Sapian sa pihak nga ang stasyon sang mga ini ang malapit lamang sa lugar nga nasunogan.
Bangud sa pagbuligay sang publiko, maswerte naman nga gilayon napalong ang kalayo kag wala na maglaton pa sa kahilapit nga mga pamalay.
images © John Marvin Oro Orale II
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
