Davao City- Miubos og 55 porsyento ang sunog nga natigayon sa dakbayan sa Dabaw gikan bulan sa Enero hangtud Hunyo karong tuiga kung itandi sa milabay’ng tuig sa susamang mga bulan.
Sa pakighinabi sa DXDC RMN Davao kang Bureau of Fire Protection (BFP) Davao City Fire Inspector Christian Cena, gisulti niini nga duna na’y 172 ka mga sunog nga nahitabo sa dakbayan karong tuiga apan mas ubos kini og 55 porsyento kung itandi sa milabay nga tuig.
Sumala ni Cena, sagad sa hinungdan sa sunog sa syudad mao ang iligal nga electrical connection ilabi na sa mga panimalay.
Matud niini, ang mga posibleng rason sa pagkunhod sa sunog sa dakbayan mao ang pagka-epektibo sa information drive sa BFP uban ang media, koordinasyon sa ilang buhatan ug mga barangay, ug uban pang mga aktibidad sa ilang opisina.
Padayon sab ang pakig-koordinar sa BFP ngadto sa mga responsableng ahensya sa gobyerno aron mas masabtan sa katawhan ang importansya sa fire safety.
Sa pikas bahin, gibutyag sab ni Cena nga 10% sa mga establisyemento sa dakbayan sa Dabaw ang girekomenda sa BFP Davao nga mabutang sa blacklist sa Business Bureau tungod sa wala pag tuman sa fire safety standards sa BFP.
Gibutyag niini, gawas sa kapin 39 mil ka mga establisyemento nga rehistrado sa syudad sa Dabaw, 60% ang na-inspect sa BFP, ug 10% niini ang misupak sa mga probisyon sa Republic Act 9514 o Fire Code of the Philippines of 2008.
Matud ni Cena, sagad nga nasupak niining blacklisted nga mga establisyemento mao ang 13 prohibited acts nga nakasulat sa balaod, sama sa pag babag sa entrance ug exits, wala pag tuman sa safety compliance, ug uban pa.
Gihatagan og lugway sa BFP ang maong mga establisyemento nga i-comply ang mga nagkadaiyang probisyon sa balaod nga nasupak.
Dugang ni Cena, muhimo na sab sa musunod nga mga adlaw og inspeksyon ang BFP aron sutaon kung nituman ba o wala kini nga mga establisyemento sa rekomendasyon sa BFP.
Target sab sa maong buhatan nga mahuman na ang inspeksyon sa tanang mga establisyemento sa dakbayan sa Dabaw sa bulan sa Agosto ning tuiga.
Kasamang Merle Comidoy
tags: Mindanao, Davao City, DXDC, DXDC 621, Merle Comidoy, Bureau of Fire Protection XI, Fire Inspector Christian Cena
