Davao City – Sunod-sunod nga sunog ang natigayon adlaw’ng Biyernes, Pebrero 22, sa nagkadaiyang lugar sa dakbayan sa Davao.
Sumala ni SFO3 Ramil Gillado tigpamaba sa Davao City Central Fire District nga tulo ka mga sunog ang ilahang natala.
Gibutyag ni Bunawan PNP station commnader PCI Noel Villahermosa atol sa interbyu sa RMN Davao nga anaa sa 28 panimalay ang gilamoy sa kalayo diin 26 ang totally damaged ug duha ang partially damaged sa may Km. 22 Calderon Bud-Bud Bunawan, Davao City alas-2:00 sa hapon.
Usa ka senior citizen nga anaa sa 60-65 anyos nga giila nga si Carlito Ramos ang angol atol sa sunog human nga mapaso ang likod niini.
Sumala sa imbestigasyon nabiyaang niluto sa abuhan sulod sa balay ni Zacarias Torremocha ang kawsa sa maong sunog.
Samtang pasado alas-5:00 sa hapon, usa ka balay ang naugdaw didto sa may Sitio Ubat, Catalunan Grande.
Matud ni Gillado nga usa ka lalaking adunay problema sa pangisip ang gihawiran karon sa mga awtoridad kinsa ingong nisunog sa maong balay.
Ug alas-6:30 sa gabie ni-ulbo usab ang sunog sa usa ka panimalay sa may Kasilak, Bucana.
Wala na makabuylo pa ang kalayo tungod kay dali kining napalong sa mga residente.
Matud ni Gillado nagpadayon pa ang imbestigasyon sa pagkakaron aron masuta ang mga hinungdan ug damyos sa maong mga sunog.
RadyoMaN Aimee Guinita
