Sumala ni Davao City Fire District Investigator Senior Fire Officer 4 Ramil Gillado nga migawas sa ilang datos nga miparka lang og 45 ka insidente sa sunog ang dakbayan karong tuiga kon dunay pag-ubos sa 33 ka fire incidents itandi sa dul-an gatos sa parehong buwan sa tuig 2022.
Suma ni Gillado nga walay natalang namatay ni naangol sa mga sunog nga natigayon sa nakalabay’ng buwan di sama sa samang period sa miaging tuig apan wala na gidetalye pa sa opisyal kon pila ang naangol sa sunog niadtong panahona.
Gibatbat sa senior fire officer nga dakong tabang sa pagkibhang sa mga sunog niadtong Enero karong tuiga ang pagpahigayon og information drive may kalabotan sa “Oplan Ligtas Pamayanan Program” kung asa ginatudlo dinhi ngadto sa mga lumulupyo ang pagdeterminar og hazard items ug pag-unplug sa mga appliances nga nakasaksak aron dili mag-overheat sa mga kabarangayan.
Dugang pa niini, ang mapinadayonon nga pakig-alayon sa BFP XI sa mga barangay opisyal aron hangyoon ang mga residente nga dili okuparon ang mga dalan pinaagi sa pagparking sa ilang mga behikulo o trisikad aron sa panahon sa pagresponde dili mabalda ang mga kabomberohan ug makaabot dayon sa lugar kung asa dunay sunog.
Gikanayon ni Gillado nga nag-una gihapon sa mga hinungdan sa sunog mao ang electrical short circuit ug taas ang insidente sa residential area ug dyutay lang sa mga establisimiento sanglit lakip sa mga rekisitos alang sa renewal sa business permit matag tuig ang pag-inspection sa mga patigayon.
Kahinumdoman, sa 2022, miabot sa 551 ang sunog nga midanyos og 63 milyones ka pesos ug anaa sa tulo ang namatay ug siyam ang naangol.
RadyoMaN Joel Viray
