Davao City – Emosyonal ang mga bombero ug ubang rescuers nga miresponde sa sunog sa NCCC Mall Davao tungod sa mga batikos nga ilang nadawat sa social media gikan sa ubang mga netizens.
Sa interview sa DXDC RMN Davao kang Senior Fire Officer Ramil Gillado, Davao City Fire District Fire Arson Investigator, sumala niya dili tanan tawo masatisfy sa ilang ginabuhat apan matud pa niya gibuhat nila ang tanan kutob sa ilang makaya.
Dugang ni Gillado, bisan pa man gipangkapoy na ang uban kanila gikan pa nagresponde sa baha sa Jade Valley ug uban pang lugar dinhi sa Davao diin ang uban usa ka oras lang nakatulog, sa ngalan sa serbisyo, mirespionde ug mitabang gihapon sila aron masalbar ang mga natrap ug mapalong ang kalayo.
Taliwala sa mga nagbatikos, duna man sab uban nga misuporta ug misaludo kanila.
Gawas sa misa nga giorganisa sa lokal nga gobyerno sa Davao sa NCCC Mall, mihimo usab og misa ang mga responders alang ngadto sa mga nangamatay sa sunog sa pagpanguna sa BFP XI sa Fire District Office kagahapon sa buntag nga gitambongan ni Mayor Inday Sara Duterte-Carpio ug mga responders.
RadyoMaN Renz Barbarona
