BACOLOD CITY – Kon maayo ang baklanay sang palupok makaginansya ang manugbaligya, apang kon mahina, ang ila ginansya nagakadto lang sa mabilin ukon sa wala nabakal.
Ini ang ginpahayag ni Benito, tag-iya sang Mary Ann’s Fireworks nga isa sa nagabaligya sa likod sang John Paul Tower sa reclamation area nga amo ang designated area nga ginpahamtang sang ciudad.
Sa interview sang DYHB, ginpahayag ni Manong Benito ang ila kapital sa palupok nagadangat man halin 50k tubtub 100k kag kon maubos ini tanan, maka-ginansya man sila sang 20 mil pesos ukon igo-igo lang sa ila pangabudlay.
Suno kay Benito nga indi man basta-basta lang magbaligya sang palupok bangud kinahanglan pa sila nga mag-gasto sang more or less 10k pesos para sa seminar kag proseso sang business permit.
Dugang pa niya nga ang mabakal sa karon amo ang fireworks kag pyrotechnics samtang ang nagbuhin gid man ang nagabakal sang palupok.
Sa bahin sang fireworks, ang mabakal suno kay Manong Benito amo ang magagmay gid lamang nga may yara sang 16 shots, nagabili halin 450, 550 kag 850 ang pinakabarato.
Ang pinakamahal naman nga fireworks nagabili halin 1k, 3k tubtub 10k, 36 shots apang mas matahum ang resulta sang lupok sa ibabaw.
Sa bahin sang firecrackes sa gihapon ang mabakal amo ang trianggulo, 5 star kag pwitis. Samtang, matapos nga gindula ang kamara ini ang ginbuslan sang big candle nga indi tuman ka tunog kag indi man mabaskug ang lupok kag nagabalor sang 80 pesos tagsa ka pakete.
Ang presyo naman sang trianggulo 50 pesos per pack, ang whistle bomb kag pwitis naman mabakal sa tag-5 ka pesos ang bilog./Ricky Filoteo photo
