Davao City – Gihimakak ni Davao City Mayor Inday Sara Duterte-Carpio nga siya ang mamahimong opisyal nga First Lady sa administrasyong Duterte human kini unang mitambong sa internasyonal nga kalihokan kauban iyang amahan nga si Pres. Rodrigo Duterte sa nasud China.
Pinaagi sa text message, giklaro sa mayora nga trabaho lamang isip Mayor sa Davao City ug ginatabangan lamang niya ang presidente pinaagi sa iyang personal nga kapasidad.
Kahinumdoman nga gi-ubanan ni Mayor Duterte ang presidente didto sa Boao, China kaniadtong adlaw’ng Lunes alang sa opening ceremony sa Boao Forum for Asia (BFA) Annual Conference 2018.
Gani, samtang wala usab ang mayora sulod sa upat ka adlaw, gipaniguro ni Vice Mayor Bernard Al-ag nga hapsay ang pagpadagan sa syudad sa Davao.
Gitataw sa bise-mayor nga bisan wala ang presensya sa Mayora, nagapadayon sa gihapon kini og monitor sa syudad pinaagi usab sa koordinasyon sa kapulisan sa Davao City Police Office.
RadyoMaN Jason Amisola
