Davao City – Dako og tabang alang sa mga empleyado sa gobyerno ang ipatumang flexible working schedule kon flexi time sa City Government of Davao.
Kini ang giingon ni Erika, usa ka empleyado sa city hall atol sa pakighinabi sa DXDC RMN Davao kaniya.
Gani sigun niya nga usahay makaapekto sa ilang mga trabahuon og ma-late sila tungod sa bug-at nga trapiko sa syudad.
Subay kini sa flexi time scheme diin usa kini ka kasabutan tali sa empleyado ug kompanya nga gitrabahoan niini aron i-adjust ang working schedule sa kondisyon nga sundon gihapon ang mandatory eight working hour schedule sa matag adlaw.
Ang maong work scheme nahasubay sa Civil Service Commission Memorandum Circular No. 14 1989 diin ubos sa maong proposed flexi time schedule guidelines, ang empleyado mamahimong mupili sa reporting time niini gikan alas-7:00 am sa buntag ngadto sa alas-4:00 sa hapon; 7:30 am ngadto sa 4:30 pm; 8:30 am ngadto sa 5:30 pm o 9:00 am ngadto sa 6:00 pm.
Sa mga buot mupila sa bag-ong mga schedules, mamahimong mananghid lang sa ilang mga head sa buhatan.
RadyoMaN Renz Barbarona
