Davao City – Magpatuman sa flexible working schedule kon flexi time ang City Government sa Davao alang sa mga empleyado nga maapektohan sa sobra kahuot nga trapiko sa syudad karon.
Ang flexi time scheme usa ka kasabutan tali sa empleyado ug kompanya nga gitrabahoan niini aron i-adjust ang working schedule sa kondisyon nga sundon gihapon ang mandatory eight working hour schedule sa matag adlaw.
Sa memorandum nga giluwatan ni City Administrator Zuleika Lopez, gitudlo ang traffic congestion sa syudad nga kawsa nga daghang mga empleyado ma-stress pagsugod pa lamang sa adlaw nga posible usab nga mamahimong hinungdan nga maapektohan ang kalidad sa ilang pagpanarbaho.
Ang maong work scheme nahasubay sa Civil Service Commission Memorandum Circular No. 14 1989 nagtagana nga mamahimong ipasibo ang oras pagpanarbaho sa konsiderasyon nga dili maapektuhan ang gi-require nga 40 ka oras nga pagpanarbaho sulod sa usa ka semana sa matag empleyado kun trabahante.
Ubos sa maong proposed flexi time schedule guidelines, ang empleyado mamahimong mupili sa reporting time niini gikan alas-7:00 am sa buntag ngadto sa alas-4:00 sa hapon; 7:30 am ngadto sa 4:30 pm; 8:30 am ngadto sa 5:30 pm o 9:00 am ngadto sa 6:00 pm.
Kadtong mga workers kinsa buot mo-ambit sa maong bag-ong working schedule pananglitan kadtong nagpuyo sa malagyo nga mga lugar mamahimong makig-istorya sa ilang tagsa-tagsa ka mga head kun mga kadagkuan sa ilang buhatan.
RadyoMaN Abi Bibera
