Sa interview sa DXDC RMN Davao sa personahe sa New Corella MPS, ginabalikan pa nila ang area sa gihatabuan sa krimen ilabi na niining bag-uhay lang nga pagpamusil niadtong November 12, 2024 sa gabii diin mag-live in partner ang biktima sa Purok-5, Durian, Barangay Del Pilar, New Corella, Davao del Norte.
Sa inisyal nga report, usa ka wala mailhing suspect ang kalit lang misulod sa panimalay sa mga biktimang giila lamang sila Nestor ug Alma ug namusil sa kadaghang higayon. Giingong 13 ka higayon napusilan ang lalaki nga miresulta sa iyang hinanaling kamatayon. Samtang igo sab ang ka-live in partner nga si Alma sa agtang ug gidala sa ospital.
Gipalawman karon ang imbestigasyon sa motibo sa krimen ug kung aduna ba kini koneksyon sa pagpamusil-patay sab sa naunang mga biktimang sila Christopher Recto ug Marcelino Tinapay karong Nobyembre lang sab.
Sa karon naghulat nalang ang DXDC sa tubag sa mayor sa New Corella kalabot sa maong sagunson nga insidente.
RadyoMaN Ivy Parido
