Yara na sa maayo nga kahimtangan ang foreman sang Daewo Construction Company matapos ginluthang sang driver sang ila dump truck alas 7:30 kaina sang aga (June 8) sa Barangay Agcalaga, Calinog, Iloilo.
Ginkilala ang biktima nga si Joel Trogane, 43 anyos, pumuluyo sang Barangay Durung-an, Tigbauan, Iloilo samtang ang suspek amo naman si Felix Ragas, 33 anyos sang Barangay Dalid, Calinog kag driver sang dump truck sang nasambit nga construction company.
Ginpahayag ni Police Staff Sgt. Ricky Lubas nga alas 7:30 sang aga sang magbaisay ang duha kon sa diin ginsumbag ni Trogane si Ragas kag gintuyo pa nga bun-on apang nakagabot una sang iya 12 gauge shot gun si Ragas kag ginluthang ang nasambit nga foreman.
Nakaagum sang pilas sa ulo ang biktima kag gindala sa Calinog District Hospital apang ginsaylo sa Western Visayas Medical Center.
