Sa interview sa DXDC RMN Davao kang FPOP Program Manager Hermie Escalante, giingon niini nga makaapekto gyud ang kawad-on sa problema sa pamilya sama nalang nga maaburido ang ulo nga posibleng mahinaykan ang anak apan dako’g parte ang ginikanan sa og paunsa nga madisiplina ang mga bata nga dili usab sila maabuso.
Matud pa nga tungod sa kamahal sa palaliton, aduna na’y kagutom, ug dili na magkasinabot ang miyembro sa pamilya ilabi na kung ang ginikanan wala’y trabaho diin kini posibleng muresulta sa mga pamilyang dysfunctional o wala’y maayong relasyon sulod sa panimalay.
Kini nga reaksyon ni Escalante subay sa balita nga gikamatay sa usa ka 7-anyos nga batang babae ang pagkulata kaniya sa iyang kaugalingong amahan sa Tondo, Maynila. Giingong gigutom ang bata ug inay ibalik ang sukli, iya kining gipalit og pan aron nga mahuwasan ang iyang nagkutoy nga tiyan hinungdan nga nahinaykan siya sa iyang amahan.
“Sa kultura sa Pilipino, once ang perpetrator member sa family, ang mama mismo muingon nga ayaw, dili ta mureklamo kay imoha ng amahan, maulawan ang atong pamilya. Siya ang mubabag sa hustisya sa nahitabo sa iyang anak. Daghan kaayo na sa atong katilingban karon. Mismo sila gani muingon ma’am nga ‘ayaw kay imo ng amahan, kung mulayas o mapriso ang imong amahan, mag unsa man ta? Mangamatay man ta kay wala’y mupakaon nato,” komento ni Escalante.
RadyoMan Ivy Parido
