Free wifi connection, anaa na sa Capitolyo Probinsyal ug sa ubang mga munisipyo ug syudad

41

Anaa na nahimutang sa Capitolyo Probinsyal sa Bukidnon ug sa ubang mga munisipyo ug syudad ning probinsya ang Free Wifi Connection. Kini ang gibutyag ni Engr. II Hope Shalom Labadan sa Department of Information and Communications Technology o DICT sa Probinsya sa Bukidnon sa pangutana ni 2nd Legislative District Board Member Atty. Nemesio B. Beltran Jr., kung kumusta na ang programa sa ilang ahensya nga Free Public Wifi Program.

Gawas sa Kapitolyo Probinsyal, anaa na usab kini naka-instalar sa Bukidnon Provincial Medical Center o BPMC, Bukidnon State University o BukSU main campus, mga municipal hall sa mga mga lungsod sa Manolo Fortich, Cabanglasan, Kadingilan, Don Carlos, Kitaotao ug Quezon samtang anaa usab kini sa mga plaza sa mga munisipyo sa Dangcagan, Don Carlos ug Kibawe.

Matud pa ni Engr. Labadan nga sa kasamtangan, prayoridad sa ilang ahensya sa Free Public Wifi Program ang mga State Universities and Colleges ug mga hospital, ug nagpadayon pa ang ilang pagkutay sa linya sa ubang mga syudad ug Municipal Halls, Plaza, Terminal ug mga opisina sa gobyerno.

Adunay gipaspason nga 10Mbps ang koneksyon sa internet matag lokasyon diin plano sa ilang ahensya nga patas-an pa kini kung maimplementar na ang National Broadband Project nga moabot ngadto sa 100Mbps matag lokasyon nga ilang gibutangan sa free wifi.

Dugang pa usab ni DICT-Bukidnon Provincial Officer Engr. Tricia R. Garde nga ang ilang buhatan nakipa-alayon na sa National Grid Corporation of the Philippines aron didto usab nila ibutang ang ilang linya sa fiber optic gikan sa Luzon, hangtud sa Visayas ug Mindanao.

Lakip na unya nga makapahimulos niini ang mga ahensya sa gobyerno nga nanginahanglan sa kahimanan sa internet ilabi na ang mga katawhan nga makakonektar ug libreng internet sa ilang tagsa-tagsa ka munisipyo ug syudad.

Facebook Comments