Davao City – Gikasubo sa Bureau of Fire Protection Region XI ang pagpanaw sa usa sa ilahang kaubanang bombero tungod sa COVID-19.
Gikumpirma ni Davao City Fire District Director F/Supt. Alex Pamaybay atol sa eksklusibong interbyu sa RMN Davao nga kini ang pinakaunang natala nga COVID-19 death case sa ilahang han-ay sa Davao Region.
“Sad to note that usa sa akoang mga personnel sa Toril ang naigo ug nipanaw gyod sa COVID-19 kaganihang kadlawon. Very unfortunate ni siya sa Bureau of Fire Protection. Ang atong pahisubo sa pamilya,” sumala ni Pamaybay.
Gibutyag niini, naglisod og ginhawa ang maong bombero ug didto na kini nipanaw sulod sa Southern Philippines Medical Center (SPMC) human sa pila ka adlaw nga pagka-admit.
“Ang iyahang ingon (pasyente) pagtransport niya gikan sa fire station dili daw siya kaginhawa. Pagdala sa SPMC nakita sa SPMC nga positive gyod so ilaha gyod nga gi-intubate, pagkaugma gani ato advice for dialysis siya,” sumala ni Pamaybay.
Giasikaso na sa City Fire District ang itanyag nag ayuda para sa nahibilin niining pamilya.
Nagpatuman na og lockdown sa Toril Fire Station diin kini nadestino samtang negatibo sa COVID-19 ang pipila sa mga kaubanan niini sa nagpadayong swab test sa mga personahe.
Sumala ni Pamaybay, dili binuang ug seryuso ang hulga nga dala sa COVID-19 busa kinahanglang mutabang ang publiko sa mga frontliners kontra sa delikadong balatian.
RadyoMaN Aimee Guinita
