Davao City – Nanghinaut karon ang usa ka transport group nga gamiton og tarong sa mga drivers ang madawat nga subsidiya nga gikatakdang ipang apod-apod na karong adlawa, Agosto 28, 2018.
Sa pakighinabi sa DXDC RMN Davao kang Southeastern Mindanao Diversified Drivers and Operators Cooperative (SEMDDOC) President Maning Duran, nanawagan kini ngadto sa mga Public Utility Jeepney kun PUJ operators nga kuhaon na ang Pantawid Pasada Program cash cards aron mahatag na kini ngadto sa mga drivers.
Karong alas 8 sa buntag sugdan ang pag pang apod-apod nga himuon sa GSIS subdivision gym sa may Matina ning dakbayan ug kutob pa kini unyang alas 5 sa hapon gani aduna usab schedule matag Sabado sugod sunod semana didto sa buhatan sa Land Transportation Franchising and Regulatory Board kun LTFRB XI alang ngadto sa mga operators nga dili makakuha karong adlawa sa cash card.
Samtang sumala sa LTFRB XI, kinahanglan dal-un ang OR CR sa sakyanan, prangkisa, valid ID ug 1 by 1 ID picture.
Kahinumduman nga gibutyag ni LTFRB chief Martin Delgra III nga ang Pantawid fuel cards adunay singko mil nga ayuda alang karong tuiga ug basehan sa pag alokar niini mao ang per PUJ unit.
RadyoMaN Renz Barbarona
