Davao City – Suportado sa Davao City Tourism Operations Office (CTOO) ang sugyot karon nga hingpit nang idili ang pagpabuto sa bisan unsa nga matang sa firecracker atol sa pagsugat sa Pasko ug Bag-ong Tuig sa tibuok nasud.
Sumala ni City Tourism Officer Generose Tecson, mas maayo gayod kung hingpit nang idili ang mga firecrackers aron sa ingon magmalipayon nga sugaton sa matag pamilya ang duruha ka mga special celebrations.
Ehemplo ang Davao sa pagpa-implementar sa usaka firecracker ban kay matag Pasko ug Bag-ong Tuig, naga-‘zero casualty’ ang mga ospital sa syudad sa mga biktima sa pabuto hatud sa istrikto nga implementasyon sa maong ordinansa.
Angayang sundugon sa ubang kagamhanang lokal ang firecracker ban ordinance sa dakbayan aron mabatonnan usab nila ang ‘zero casualty’ sa pabuto ang ilang mga lugar sama sa dakbayan sa Davao.
Segun ni Tecson, makaayo usab sa panglawas sa tawo ug sa kinaiyahan ang hingpit nga pag-ban sa firecrackers nunot sa kemikal sa pulbora nga gigamit sa paggama og mga pabuto.
Gidasig sa opisyal ang mga Davaoweños nga inay pabuto, mas maayong magsaba-saba gamit ang torotot sa pagsugat sa Bag-ong Tuig o dili ba kaha musalmot sa Torotot Festival sa syudad sa Davao.
RadyoMan Joel Viray
