Davao City – Giklaro sa City Government of Davao nga kinahanglang full face ang face shield nga gamiton isip usa sa preventive measures batok sa Coronavirus Disease 2019 (COVID-19) human gipagawas ang Executive Order (EO) No. 65 Series of 2020.
Matud ni Davao City Mayor Sara Duterte-Carpio nga subay sa memorandum sa Department of Trade and Industry (DTI) ug Department of Labor and Employment (DOLE) dili pwede gamiton ang half-size sa shield diin kinahanglan nga matabunan ang tibuok nawong aron nga masigurado nga protektado gikan sa virus ang usa ka indibidwal nga posibleng makuha sa ka-istorya o kauban niini.
“Ang ginasulti sa DTI and sa DOLE, dili pwede ‘tong face shield nga half-size o mata ug ilong lang ang ma-cover’an. Ang face shield (dapat) abot hangtud sa ilawom sa suwang (full face),” saysay sa Alkalde.
Hinuon gitugotan lamang nga tanggalon ang face shield kung ang trabaho duol sa kalayo, anaa sa kusina o kaha nag operate og makina ug maglisod nga makatrabaho tungod sa face shield.
Gibutyag sa Mayor nga wala pay ordinansa nga naga silot sa violators sa dili pagsuot niini sa mga lugar kung asa kini mandatory apan sa ‘national law’ regular filing sa korte ang penalty sa mga violators sa maong kamanduan.
RadyoMaN Kirby Manzon
