Davao City – Nanganti karon ang Games and Amusements Board (GAB) Anti-Illegal Gambling Enforcement Division nga ilang sikupon ang mga iligal nga pasugal sama sa jueteng kansang operasyon mikuyanap sa tibuok nasud.
Matud ni GAB Anti-lllegal Gambling Division enforcer Dominador Bangcal, mandato sa ilang buhatan ang pagpakgang sa iligal nga mga sugal apil na sa ilang dakpon ang mga nalambigit sa jueteng operations.
Segun ni Bangcal, iligal ang jueteng tungod kay walay balaud nga nag-legalize or nagtugot niini, busa ang tanang milangkob sa operasyon ug milambigit sa maong kalihukan ila gayud nga pagadakpon.
Gikumpirma ni Bangcal nga wala pa sila’y nadawat nga direktiba nga hunongon ang operasyon sa jueteng hinungdan nga magpadayon gihapon ang ilang pagpaniid ug pagpanakop sa mga nag-operate ning naasoyng matang sa sugal.
Dugang ni Bangcal nga bisan kon gi-convert na sa Small Town Lottery (STL) ang jueteng, ang mga operators ug mga financiers sa Luzon area sekreto gihapon nga nagpadagan sa maong operations.
Ang giluwatang pamahayag ni Pres. Rodrigo Duterte nga dili usa niya undangon ang jueteng gikinahanglang tukion ug pandayan kini og tukmang balaud sa Kongreso, dugang ni Bangcal.
RadyoMaN Joel Viray
