BACOLOD CITY – Gindakop sang mga katapo sang Police Station 2 ang miembro sang notoryos nga Aki Cuadra Group subng gid lang nga hapon.
Pasado 1:00PM sang ginpatigayon ang buybust operation sang mga operatives sang Station 2 sa pagpanguna ni PCInsp. Benedicto Villarias batok sa suspek nga si Edmar Escala, 18 anyos, sang Prk. Narra Baybay, Brgy. 8, Bacolod City.
Narecover sang mga otoridad ang pila ka mga sachets sang suspected shabu sa amo nga buybust.
Nakit-an sang mga otoridad in plain view, ang mga ginpang chop-chop nga mga motor sa puluy-an sang suspek.
Didto kag nahibaluan nga ang mga ini ang lunsay carnapped.
Suno sa mga otoridad, ang modus sang grupo amo ang pag sakay sang tatlo ka mga suspek sa isa lang ka motor kag magpangita sang ila biktimahon.
Sa tion nga malabyan sang mga ini ang matahum nga motor, guilayon nga tuparan ang driver kag tayaan sang .45 kalibre nga pistola para magpundo.
Gilayon nila nga kuhaon ang cellphone ukon iban pa nga mga valuables sang biktima kag paga dal-on sang mga kawatan ang motor kag magpalagyo.
Pila na ka mga unresolved, reported motornapping incident ang na record sa ciudad sang Talisay, Victorias kag Bacolod.
Dugang pa ni Villarias, ginagamit anay sang amo nga grupo ang nakawat nga motor sa pagpang hold-up, samtang gina pangitaan pa ini sang buyer.
Ang mga na recover sang Police nga mga motor amo ang duha ka Yamaha Mio Soul 125, pink kag violet. / dyHB RMN Bacolod
