Gipusil patay sa duha ka wala mailang responsable nga nakamotorsiklo ang usa ka lalaki sa Zone 1, Barangay Santa Ana, Tagoloan, Misamis Oriental.
Biktima mao si Vincent James Mahusay, hingkod ang edad, taga Malaybalay City ug kasamtangang gabantay og rubber tree sa nasangpit nga lalawigan.
Nasayran nga samtang padulong sa Rosario, Tagoloan ang biktima sakay sa iyang motorsiklo angkas ang usa ka 13 anyos nga batan-on, gitaparan matud pa kini sa mga suspek ug gipusil.
Naigo ang biktima sa tuo nga bahin sa iyang ulo hinungdan sa pagkahagba niini samtang sakay sa iyang motorsiklo.
Hinoon luwas sa peligro ang angkas niining batan-on.
Nasayran usab gikan sa higala sa biktima nga padulong unta magkuha og sakyanan ang biktima aron sakyan sa pagpangaligo og dagat dihang nahitabo ang insidente.
