ILOILO CITY – Dismayado si Lucy Francisco sang Gabriela Panay-Guimaras sa ginhimo nanday Vice Mayor Jose Espinosa III kag City Councilor Ed Peñaredondo sa pagyamuhat sa ginapatuman nga pagpahamtang sang mga breastfeeding station sa mga hospital sa siudad.
Suno kay Francisco, makit-an sa duha ka mga opisyal sang siudad ang pagka-malisyoso, pagkabastos kag wala pagrespeto sa mga kababaihan sa mga nangin pahayag sang mga ini sa sesyon sa city council.
“…nakita naton nga mga malisyoso, mga bastos, kag daw mga wala respeto sa mga kababainhan. May nanay man sila, may utod man sila nga babaye…kag kon wala sila nagabreastfeed, dapat tun-an nila kag suportaran,” ang pahayag ni Lucy Francisco sang Gabriela
Ginsiling sini nga makabig nga isa ka violence against women ang nasambit nga pagyamuhat nanday Vice Mayor Espinosa kag councilor Peñaredondo angot sa pagpahamtang sang breastfeeding station sa mga hospital sa siudad.
Hingyo pa sini sa mga opisyales sang siudad, indi pag langu-languhon ang nasambit nga topiko ilabi nga tuman ini ka seryoso nga lihok para sa mga kababainhan.
“Indi paglangu-languhon… kay responsibilidad sang aton mga opisyal nga dapat respetuhon ang reproductive function sang aton mga kababaihan.”
