Un persona quien ganao na perya ya sale muerto mientras un miembro del Philippine Navy irido despues el dos suspechao hold-upper ya rega de bala con estos na San Jose Gusu enante madrogada.
El muerto amo si Hernand Oraniola y Delos Reyes, 35, soltero de Ayala mientras el irido amo si SN1 Jonard Enolpe, assigned na Campo del Navy adentro na WESMINCOM.
Na report del Police Station 11 ta aparese si Oraniola ya gana poco mas o menos P40,000 na perya na San Jose y banda 4:30 del aga encamino ya este pabolbida muntando consu motorsiclo y cuando ya llega na san Jose Gusu, dos persona muntao na otro motorsiclo ya hace lagas y el ancas ya refica de tiro con ele.
Cuando ya tupa el bala con Oraniola, ya man wagol-wagol este na calsada y hasta ya entra le na otro lao del camino donde aquel tiempo ta bolbe si Enolpe sale na su duty donde asegun ya tupa tambien in tiro na su mano.
Cuando ya mira el maga suspechao con Enolpe quien ta bisti pa uniporme de Navy ya tene estos miedo y ya entabla sin puede sacar el cen di Oraniola.
Con Oraniola ya lleva corre na un privado hospital mientras con Enolpe ya lleva na Camp Navarro Hospital na WESMINCOM.
