Gipasalig karon ni Marawi City Mayor Majul Gandamra nga inubanan sa hingpit nga suporta sa liderato ni Pres. Rodrigo Duterte ug sa entero makinaryas sa gobyerno ug yanong katawhan, mobangon gayud sila nga mga Meranaw ug mga lungsuranon sa syudad nga gilubok ug maayo sa gubat kontra terorismo.
“In behalf of the people of Marawi, we would like to express our profound gratitude to the Duterte administration (for helping us),” matud ni Gandamra.
Matud sa mayor, malaumon sila nga pinaagi sa nagpadayong post-conflict assessment, capacity-building, social services and livelihood support programs ug uban pang mga inisyatiba, makabalik sila sa iyang yutang natawhan aron sugdan ang mapait nga proseso sa pagbarug, pag-move on ug pagtikad sa yuta nga gisabligan ug dugo sa mga kinabuhing naula sa maong ‘battle zone.’
Base sa datos, mokabat sa 70,000 ka mga indibidwal gikan sa sobra dosenang mga balangay nga gigyerahan sa Maute ug kasundaluhan sa nasud ang napugos sa paglalin sa mas luwas nga mga lokalidad.
Adunay 24 ka mga barangay ang gikonsidera nga ‘hardest affected’ sa natapos na nga gubat nga nisangpot sa dislokasyon ug ‘humanitarian crisis ‘ bunga sa pagbakwit sa ubayubay nga mga apektadong sibilyan.
RadyoMaN June Duterte
