Lima ka lalaki ang gina-alegar nag gang rape sa 15 anyos nga dalagita matapos ang birthday party nga ila gintambungan.
Base sa imbestigasyon sang Women and Children Protection Desk snag ICPO, planado ang natabo nga gang rape sa diin may dala pa nga condom ang mga suspek kag ila pa nga ginpicture-an kag ginsend sa ila group chat.
Suno kay SPO3 Debbie Yocogco sang ICPO, ala 1 sa kaagahon, Hunyo 7 sang natabo ang insidente sa diin, sang nahubog sa inom-inom sa birthday party, gindala sang lima ka lalaki ang 15 anyos nga dalagita sa balay nga ginatiniran man sang isa sa mga suspek.
Nagsaway pa kuno ang tagbalay nga “Ano na basi ano matabo da ha.”
Apang nagsabat ang isa sa mga suspek nga, “Wala ah, miga ko man ni ah.”
Didto na posible natabo ang paghimulos sang 5 ka suspek sa 15 anyos nga dalagita. Samtang ginahimo ang pagpanghimulos, ginpicture-an pa ini sang mga suspek kag ginsend sa group chat.
Alas 10 sang aga sang nagpuli ang 15 anyos nga dalagita sa ila sang ginsukmaan siya sang iya iloy angot sa gina-alegar scandal nga iya nahimo.
Nahibaluan sang iloy ang natabo bangod miembro man sang ila group chat ang pakaisa snag 15 anyos nga dalagita nga amo man ang nagpanugid sa iya iloy.
Ginsend sa group chat ang picture snag 15 anyos nga dalagita nga may nagasampaw sa iya.
Ara na sa kustodiya sang ICPO ang 2 ka 18 anyos nga suspek, ara naman sa balay dalayunan ang duha ka 17 anyos nga suspek samtang padayon pa nga ginapangita ang isa sa mga suspek.
Ginapanginwala sang mga suspek nga ila ginhimuslan ang 15 anyos nga dalagita.
Ginahulat na lang karun ang resulta sang laboratory exam sang 15 anyos nga dalagita agud mahibaluan kon ginhimuslan gid man ini.
Natalana naman nga pasakaan sang kaso ang mga suspek.
Photo from web
