Gatosan ang nakapasingot sa iFM Zumba sa Brgy. Bonbon

Tres syentos kapin kon kulang ang nakapahimulos sa libreng iFM Zumba nga gipahigayon sa Covered Court sa Brgy. Bonbon ning dakbayan sa Cagayan de Oro niadtong Setyembre 9 ning tuiga.
Ang maong kalingawan hiniusnag gidalit sa iFM 99.1 ug sa konseho sa Brgy. Bonbon pinangulohan ni Kapitan Jackelyn Marte ngadto sa mga taga Brgy. Bonbon sabay sa bisperas sa kasaulogan sa kapistahan ni Sr. San Nicolas, ang patron sa maong barangay.
Gawas sa libreng Zumba, nakadawat usab ang pipila ka mga partisepante ug mga papremyo nga giandam sa iFM ilabina kadtong mga nakasubay sa aksyon sa mga Lisensyadong Zumba Instructor.
Nakigduyog usab sa kalingawan ang mga DJ sa iFM, mga kasama sa DXCC, ingon man ang mga empleyado sa barangay lakip na ang mga miyembro ug lideres sa 4Ps sa maong barangay.
Ang iFM Zumba usa lamang sa mga Programa sa iFM ngadto sa mga barangay nga adunay tumong nga ma-promote ang makalingaw nga pamaagi sa pag-ehersisyo.
Alang sa dugang kasayuran kabahin sa libreng iFM Zumba, mamahimong mobisita sa stasyon sa iFM 99.1 nga anaa nahimutang sa Echem-Velez Sts., Cagayan de Oro City.

Facebook Comments