Gatosan ka pamilya sa Davsur nagpabiling anaa sa evacuation center

Davao City – Padayong gipanawagan sa Local Government Unit (LGU) sa Davao del Sur kung kinsa kadtong buot mag-donate og mga sinina alang sa mga biktima sa baha isip dakong tabang alang kanila.

Sa interbyu sa DXDC RMN Davao kang Sherwin Cesar, Provincial Information Officer (PIO) sa Davao del Sur, gibutyag niini nga sa November 19, 2022, kapin 200 ka mga residente ang anaa pa sa evacuation center partikular na sa Poblacion, Malalag, Davao del Sur.

Sumala ni Cesar, adunay nay natunol nga pasiunang tabang ilabi na sa pagkaon, apan nanginahanglan usab sila og mga sinina ilabi na kadtong walay nasalbar o kaha nalubog sa baha ang ilang mga gamit.

“Kung mahimo unta, kung naa ‘tay mga donors, ma-appreciate sa mga biktima sab aha diri sa Malalag kung naa ‘tay mga used cloths nga mapadala diri,” panawagan ni Cesar.

Wala pa usay inpormasyon ang provincial official kung adunay plano si Presidente Ferdinand “Bongbong” Marcos nga personal nga mubisita sa lugar.

RadyoMaN Kirby Manzon