Davao City – Nabalaka ang sektor sa transportasyon sa pagka alkanse sa mga PUJ driver kun tugutan nga makapamasada ubos sa general community quarantine diin adunay pag modify sa ilang mga unit sama sa pagbutang ug barrier sa mga bangko.
Sumala ni Maning Duran presidente sa Southeastern Mindanao Diversified Operators Cooperative (SEMDOC) nga mas maayo pang dili na lang mamasada ang mga PUJ driver nungka nga manguli sa ilang tagsa tagsa ka pamilya human ug garahe nga walay ginansya sa pagpamasahero.
Matud ni Duran nga maayo unta ug adunay ayuda ang sektor sa transportasyon aron makapasar sa panginahanglanon sa ilang pamilya bisan ug ma-alkanse sa pagpamasada apan ang gisaad nga hinabang sa lokal nga kagamhanan wala man daw matuman.
“Ang imung sakyanan lima lima sa napulo ang sakay ang makarga ana lima lang gyud. So ang mahitabo diha lugi ang driver so maayo pa dili nalang tugutan padaganon. Kay nakasabot man ta ana nga kana siya para man na sa kaayuhan sa atong driver nga dili matakdan og COVID-19, proteksyon pud sa atong mga pasahero nga dili magkatakdanay. Dili lang usa nato padaganon” segun ni Maning Duran.
Gisugyot niini nga angay adunay representative sa sektor sa transportasyon diha sa pagmugna ug mga guidelines sa quarantine aron usab matuki ang ekonomikanhong aspeto sa driver ug operator.
Gidugang ni Duran nga delikadong ipugos ug padagan ang mga mga PUJ tungod kay masakripisyo ang maintenance sa mga unit gumikan kay walay ginansya ang driver ug operator aron ikapamalit ug pyesa sa mga sakyanan nga magdagan dagan.
RadyoMaN Erin Lumosbog
