Davao City – Gibati karon og tumang kabalaka ang kagamhanang probinsiyal sa Davao del Sur kung magdugay pa hangtud sa bulan sa Hunyo ang COVID-19.
Nagguol karon si Davao Del Sur Governor Douglas Cagas nga basin dili na makasugakod ang Kapitolyo sa pagtabang sa katawhan kung molungtad pa hangtud sa Hunyo ang krisis nga dala ni COVID-19.
Matud ni Cagas, hapit nang mahurot ang kwarta sa probinsiya gitagana alang sa paghatag og ayuda sa mga tawo nga naapektuhan ug nawad-an og panginabuhian tungod sa COVID-19.
Segun sa gobernador, matag adlaw ubay-ubay nga mga trucks ang nagakarga og relief goods ug naga-adto sa mga barangay aron tunolan og tabang ang mga pamilya nga nawad-an og trabaho hatud ning maong krisis.
Bisan og naglisud ang probinsiya sa pagsuporta sa iyang katawhan, dili pabor ang amahan sa probinsiya nga mapailawom sa General Community Quarantine (GCQ) ang Davao Region.
Kini human nahadlok si Cagas nga kon mapaubos sa GCQ ang rehiyon, basin mas musamot na hinoon ang pagkaylap sa virus ug magkakaso na hinoon ang Davao del Sur.
Ang mga probinsiya sa Davao Del Sur, Davao Occidental ug Davao Oriental gipailawom na sa GCQ apan obserbasyon sa gobernador nga mas daghan na hinoon ang mga nakasupak.
Nanawagan si Cagas alang sa hiniusa nga pangamuyo ngadto sa Diyos aron wagtangon na ang COVID-19 sanglit sa tanang sitwasyon sama karon, ang Diyos ra gayud ang makatabang sa tanan.
RadyoMaN Joel Viray
