Pagadian City – Gipangandaman na sa probinsyal nga panggamhanan sa Zambaoanga del Sur ang gikatakdang pagpalu-ag sa Enhanced Community Quarantine human gimando ni Presidente Rodrigo Duterte nga ipa-ilalom na sa General Community Quarantine ang mga lugar nga masakop sa mga moderate ug low-risk sa COVID-19 tungod sa minos nga kaso sa makamatay nga coronavirus.
Kagahapon nagpagawas og laing mando ehekutibo si Governor Victort Yu, nga naghan-ay sa mga guidelines sa pagpa-ilalom sa probinsya ngadto sa General Community Quarantine nga ipatuman sugod Mayo 1 kansa nagkonsidera sa mga lakang nga angayang ipatuman aron dili mabutang sa alanganin ang katawhan.
Ilalom sa GCQ ablihan na pagbalik ang pampubliko nga transportasyon apan limitado lamang ang byahe niini sulod probinsya dungan ang pagpaniguro nga obserbahan ang physical distancing ug dili pun-on sa pasahero ang bus o sakyanan kundili 50 porsyento lamang sa kapasidad ang ikarga niini.
Gidasig usab ang matag-Local Government Units (LGUs) nga mogahin og sakyanan sa publiko kun ugaling walay mobyahe sa bus sa ilang lugar.
