Davao City – Gikalisangan sa mga residente ang giingong ‘barko sa engkanto’ nga kung muagi na kini sa sapa sa Bario Okoy timailhan matud pa kini nga aduna na usab silay kuhaong kinabuhi sa mga namuyo kilid sa sapa o adunay trahedyang mahitabo.
Tuig 1999 pasado alas-5:00 hapon lab-as pa sa memorya ni Cindy Casayaran ang panghitabo diin gilunop ang ilahang lugar human kalit lamang nitaas ang tubig sa sapa.
Nadungog matud pa niini ang kusog kaayo nga busina sa barko gikan mismo sa sapa.
Matud pa sa iyang apuhan kaniya nga oras kini sa paglabay sa mga engkanto sakay sa ilahang barkong adunay mga bulawan.
Adunay pagtuo ang mga katiguwangan nga sa matag lima ka tuig mulabay gayod ang barko sa engkanto.
Gisaysay niini nga usa ka mag-inahan ang namatay atol sa pagtaas sa tubig.
Samtang ginalikayan ni Susan Montaño ang dakong punuan sa Acacia kinsa didto matud pa nigawas ang maong dakong barko.
Wala gayod nila gipangputol ang punuan sa palibot kay gituohang dinhi namuyo ang mga engkantong gabantay sa sapa.
Karon nga pamilyado na si Cindy kanunay usab nga tambag niya sa iyahang mga anak nga respetuhon ang mga dili nato makitang mga elemento sa palibot.
Katuohan man o dili apan mao kini ang kasinatian sa pipila ka mga residente mahitungod sa barko sa engkanto nga nagabusina panahon nga muagi na kini sa sapa.
Dili man kini sila makita apan tingali nagpahibalo sila nga dili ra kita ang namuyo niining kalibutana.
RadyoMaN Aimee Guinita
